2Cor 10 | KYG | STEP | Polo'namo nagai'nimo lapao ke hove. Kalaisi'a yuna aipa vekamo mai'neno yagu yaga gemo hu'niya agufa gemo hu'na lapa nepauve. Nagaemo lapaulagale'mo mai'ne'nae'mo koli nehu'na ge nosuva'monanafa lapakae'e'mo magokepi lokae'na o'mai'ne'nae'mo koli osu'na lokiya gemo nehuva vekamo'namo lapa nepauve.

2 Corinthians 10

Polofe'mo hu'a faipa hu'a ate'nageno'ae'mo ge huno aeno apakase'niya gemae

1 Polo'namo nagai'nimo lapao ke hove. Kalaisi'a yuna aipa vekamo mai'neno yagu yaga gemo hu'niya agufa gemo hu'na lapa nepauve. Nagaemo lapaulagale'mo mai'ne'nae'mo koli nehu'na ge nosuva'monanafa lapakae'e'mo magokepi lokae'na o'mai'ne'nae'mo koli osu'na lokiya gemo nehuva vekamo'namo lapa nepauve. 2 Nehuva'monanafa lapao ke he'nae'mo fiku yanage'na lapakaetegamo u'na mai'ne'na lagaefe'mo, ma mopafi vaya'ai kava'mo apakufamo hau'niya kava'mo nehae, hu'a apakesamo ne'afiya vaya'aife'mo koli osu'na himamu'nileti'mo lokiya gemo huguve. 3 Lagaemo ma mopafi'mo mai'netae'mo lagufafi'mo mai'nona'monanafa ma mopafi vaya'mogi nehaya agufa kava'mo huta lagufa'aletike'mo kame nosune. 4 Muki kame nehuna yatimo ma mopafi vaya'mogi ali'ne'a kame nehaya agufa ya'mo ohane'nifa Goti lokiya himamu'aleti'mo kame vaya'ai yafa kegi'ya'apimo aeta halagape vaisuna ya'mo hane'niye. 5 Lagaemo muki kame vaya'ai yatala no'apimo heta vayu hulita emiteta afepi ne'atona agufa kava'mo huta vaya'mogi himu'namu apakesamo ne'afiya kava'mo Gotitegamo kame hu'a ne'ate'a ge'amo amagi'a ne'atalaya kavatefe'mo nofi kita ne'apatone. Lagaemo muki apakesamo ne'afiya kava'amo alita nofi kita apateteta Kalaisi'mo akame hisaya kavategamo apavalelituta ne'apatone. 6 Lapakaemo alagepa hutapa lakame hisagetae'mo latale u'a kame vayati'e'mo mai'naya vaya'aina apamagisuna kayo'mo alo huta male'none. 7 Amega apakufalefe'mo lapakesamo ne'afifiye. Kalaisi vaya'amo mai'none, hu'a apakesamo ne'afiya vaya'mogimo lagae'efe'mo, Kalaisi vaya'amo mai'nae, hu'a halate apaipafi'mo apakesamo afigae. 8 Ala kava ne'mo'a alino lami'niya himamutileti'mo alita hosu huta lapatesunafe'mo alino olami'nifa alita lokiya vaita lapatesunafe'mo alino lami'niye. Lami'niya himamu lokiya'alefe'mo mago'e hu'na lagitile'mo ali'na asaga hu'na atesuvafe'mo navagage osugiye. 9 Huno lamo'ya aisiyafeke'mo mani avo'mo nekae, hutapa lapakesamo o'afisayafe'mo mani gemo nehuve. 10 Ani kavafe'mo mago vaya'amogi, mani avo'mo kae'niya gemo'mo kana hu'nigeno lokiya vai'niya'monanafa lagae'e'mo lokaeno mai'niya afina'mo ina agufa vekamo mai'neno ge hu'niya ge'amo'mo afa gegana huno hane'niye, hu'a nehae. 11 Ani vaya'mogimo ina kavafe'mo afisaya ya'mo hane'niye. Apakae'e'mo o'mai'netae'mo na agufa gemo avo'mo kae'nopi apakae'e'mo magokepi lokaeta mai'netae'mo magoke agufa himamutileti'mo hugune, hu'a apakesamo afigae.

12 Mago vaya'mogimo apakai'api apaki'apile'mo ali'a asaga hu'a nehae. Lagaemo, ani agufa vaya'mo mai'none, huta hisupi aeta apakase'none, huta hisupi ani agufa gee'mo koli nehune. Ani vaya'mogimo apakai'api kava'apileti'mo magoke magoke hu'a ali'a fako hu'a apate'apae'mo, ae'na agase'nofi aeno nagase'nifi, hu'a ali'a fako nehaya'monanafa alagepa hu'a afite'a o'age'nae. 13 Nehaya'monanafa lagaemo ali'yatilefe'mo mago'e huta lagitile'mo alita asaga huta olategaune. Ha'ao, Goti'a ali'ya'amo alisunafe'mo mopamo ago hakino lami'niya mopale'mo lapakaemo mai'naya folagapi'mo uta hakute'mo ali'ya'mo ne'alune. 14 Lapakaemo haku maleteno lami'niya mopale'mo o'maitapa malaga mai'naesinana lapakaetegamo o'u'nonesina'monanafa mopamo alino hakino lami'niya mopa haku'mo aeta agaseta lapakaetegamo Kalaisife'mo alagepa faigoko ge'amo alinita o'u'none. 15 Lagaemo hakutimo hane'niyana malaga vaya'ai ali'ya'apilefe'mo, alagepa ali'ya'mo ali'none, huta nosune. Lapakesa afita fatago nehaya kava'mo'a kosime kosime uno haisigetapae'mo ali'yatimo mago'e hutapa alita ala hutapa latesagetae'mo aeta lapakaseta visunafe'mo lavayagunagu huta lapakava mai'none. 16 Lagaemo alu vaya'aina hakino apami'niya ali'ya'apilefe'mo, alagepa ali'ya'mo ali'none, huta osuta lapakamelega vaya'aitegamo uta alagepa faigoko ge'amo hapa paigesune. 17 Mago vekamo'a amogaga aisiyafe'mo hau'nisiyana Ala kava nefeke'mo amogaga aino, huno hu'niye. 18 Apakai'apie'mo, Alagepa ali'ya'mo ali'none, hu'a nehaya vaya'mogi ala apaki'apimo o'aligafa Ala kava ne'moke'mo, Alagepa ali'ya'mo ali'nae, huno hisige'apae'mo ala apaki'apimo aligae.